مفيش حاجه مستحيلة طالما فى بنى آدم غيرك حققها إنت كمان تقدر لو حطيتها هدف بالنسبالك وأخذت بالأسباب.
حاول تجرب تعمل أى حاجه إنت حابب تعملها. التجربة هتخليك تتعلم أى حاجه وماتخافش لو فشلت ده طبيعى لإن النجاح أصلا ماهو إﻻ مجموعة محاوﻻت فاشلة لكن كل مره بتاخد خبره وبتتعلم منها.
وكمان ” إتعلم شىء من كل شىء ” حتى لو مش مجالك او مش حاببها ﻻن ده هيوسع معرفتك وتفكيرك والحياه هتجبرك انك تمر بالحاجة دى فوقتها هتعرف قيمتها ومش هتخلى اى حد يستغلك.
مفيش حاجة إسمها حد عنده موهبة والتانى معندوش كل واحد عنده موهبة فى حاجة واحده وبتكون مختلفه من شخص لآخر وفى الغالب الموهبة دى بتكون فى حاجه بتحب تعملها وإنت صغير حاجه إنت بتعملها بإرادتك وحاببها لكن تأثير المجمتع اللى حواليك بينسيك الموهبة دى. ولو إنت مشيت مع تيار المجتمع هتضيع . حتى لو الظروف أجبرتك على حاجة مبتحبهاش خليك شجاع واخلق لنفسك فرصة لحاجة إنت بتحبها.
ولو ملاقيتش موهبتك يبقى ﻻزم تجرب كل حاجة حاسس إنك بتحبها . اى عمل او مهنة فى الدنيا محتاجة منك عدد ساعات معينة علشان تقدر تتقنها.
وأخيراََ حاول تبعد عن المحبطين لأن الناس دى كل مهمتها فى الحياة التذمر والتريقه على خلق الله. دور على الناس الناجحه أو اللى عندها شغف فى حاجه لإن الناس دى هتنقلك طاقه إيجابية وتحفزك دايما.